Gideploy ang kapin 4,000 ka mga personahe sa Philippine National Police (PNP) ug force multipliers sa Bukidnon aron masiguro ang kaluwasan ug kalinaw sa Kaamulan Festival 2026 ug Northern Mindanao Regional Athletics Association (NMRAA) Meet 2026 sa dakbayan sa Malaybalay, nga pormal ablihan ugma, Huwebes Marso 19, 2026.
Sa eksklusibong pakighinabi sa Juander Radyo Malaybalay, gipadayag ni PMSG Kent Hanzel Bughaw spokesperson sa Malaybalay City Police Station nga hugot nga gipatuman sa Bukidnon Police Provincial Office ang mga lakang sa seguridad aron maprotektahan ang mga residente, atleta, ug mga turista nga motambong sa maong mga kalihukan.
Gisiguro sa kapulisan nga magmalampuson ang selebrasyon ug malikayan ang bisan unsang kriminalidad. Dugang pa ni PMSG Bughaw nga nagpadayon ang ilang mga random checkpoint sa dakbayan aron masiguro nga walay makalusot nga mga daotang elemento nga makahatag kasamok sa mga kalihukan.
Alayon niini gipasidan-an usab ang publiko labot sa masinatiang hugot nga dagan sa trapiko sa may Sayre Highway, Laguitas, Malaybalay City partikular na sa mga lugar duol sa Bukidnon Sports & Cultural Complex.
Giawhag ang mga motorista nga magplano daan, mangitag alternatibong mga rota kung mahimo, ug iplastar ang oras sa pagbiyahe aron malikayan ang mga pagkalangay.
Samtang ang mga sakyanan lamang nga adunay opisyal nga Vehicle Pass ang tugutang makasulod sa Bukidnon Sports & Cultural Complex gikan Marso 18 hangtod 24, 2026. Adunay gitudlo nga drop-off point alang sa tanang bisita ug manambong nga walay mga sakyanan.
