Gisugyot karon sa National Food Authority (NFA) nga mahatagan sila og “emergency powers” o espesyal nga gahum aron direktang makabaligya og mas barato nga bugas sa publiko taliwala sa nagkakataas nga presyo niini sa merkado. Pinaagi niini nga lakang, tumong sa ahensya nga tangtangon ang mga “middlemen” aron mas mapakunhuran pa ang presyo, mas dali ang pagpalit og humay gikan sa mga lokal nga mag-uuma, ug mapadali ang paggaling niini.
Plano sa NFA nga itanyag ang ilang bugas sa presyong ₱33 hangtod ₱36 matag kilo ngadto sa mga lokal nga kagamhanan (LGUs) ug Kadiwa stores. Ubos sa kasamtangang Rice Tariffication Law (RTL), limitado ang gahum sa NFA diin kinahanglan pa nilang moagi sa Food Terminal Inc. (FTI) sa dili pa makaabot sa mga konsumante. Tungod kay puno na ang ilang mga bodega, kinahanglan na usab nga ipagawas ang mga “aging stock” aron adunay kabutangan sa mga bag-ong ani nga palay.
Gipasalig ni NFA Administrator Larry Lacson nga kon maaprubahan ang maong gahum, mas paspas silang makapang-atubang sa merkado aron maminusan ang kalisod sa mga pumapalit, ilabi na nga ang presyo sa commercial rice karon moabot na sa ₱52 hangtod ₱58 matag kilo tungod sa epekto sa pagsaka sa presyo sa lana ug transportasyon.
Photo Courtesy: Pilipino Mirror
