Gipahigayon sa lokal nga kagamhanan sa Malaybalay City ang 1st Trade Expo ug KADIWA isip kabahin sa selebrasyon sa ika-28 nga Charter Day sa syudad nga gisugdan kagahapong adlawa, Marso 16 hangtod Marso 20, 2026 sa Plaza Rizal sa dakbayan.
Sa eksklusibong pakighinabi sa Juander Radyo Malaybalay, gipadayag ni City Economic Enterprise Development and Management Office (CEEDMO) Head Romeo R. Lapeciros Jr. nga ang maong kalihokan gitumong aron mapakita ug mapalig-on ang mga lokal nga produkto, negosyo, ug agrikultural nga produkto gikan sa nagkalain-laing barangay ug lokal nga negosyante sa syudad.
Pinaagi sa Trade Expo ug KADIWA, makapalit ang mga residente ug bisita sa presko ug abot-kayang mga produkto, samtang gisuportahan usab ang mga mag-uuma ug gagmay’ng negosyante.
Kabahin kini sa daghang aktibidad nga giandam sa syudad alang sa Charter Day celebration, nga nagpakita sa padayon nga pagpalambo sa ekonomiya ug pagtinabangay sa komunidad sa dakbayan.
Gilauman sa lokal nga kagamhanan nga daghang residente ug bisita gikan sa lain-laing lugar ang motambong ug mosuporta sa maong kalihokan, labi na nga ang dakbayan adunay mga dagkong kalihukan sama sa Kaamulan Festival ug ang NMRAA 2026.
Photo Courtesy: Mayor Warren Pabillaran
