Nahimong init nga hisgutan sa usa ka sikat nga talk show sa Thailand ang pagtanyag sa usa ka misis ngadto sa mistress sa iyang bana og “rental agreement” nga nagkantidad og 30,000 Baht o katumbas sa Php47,000 matag bulan isip abang sa iyang bana.
Mas nakapakurat pa sa mga nanan-aw sa programa nga “Hone Krasae” kay misugot ang babaye(mistress) sa maong kasabotan ug giingong dili problema ang kwarta. Apan ang mismong mister nga usa ka pulis ang mipalag ug wala mouyon sa maong ideya.
Sa maong interbyu, gisaysay sa 31-anyos nga misis nga gitago sa pangalang “Kwang” ang iyang kasinatian. Matod pa niya, kapin 10 ka tuig na silang minyo sa iyang mister ug adunay 8-anyos nga anak.
Nagsugod ang iyang pagduda niadtong 2025 human iyang mabantayan kanunay nang dugay mouli sa balay ang iyang bana. Tungod niini, mikuha siya og private investigator nga iyang gibayaran og 10,000 Baht (Php15,000) matag adlaw aron sundan ang iyang bana.
Wala madugay, nasakpan sa imbestigador ang iyang nga bana kauban ang iyang mistress sa usa ka condominium.
Bisan pa og nibalik sa balay ang mister ug misaad nga undangon na ang iyang relasyon sa laing babaye, usa ka gabii nakamata si Kwang nga nakit-an ang iyang bana nga naghilak ug nagkurog. Didto giangkon sa iyang bana nga dili niya kayang biyaan ang iyang mistress.
Photo Courtesy: THE BRHAT
