Aron masiguro ang hapsay ug luwas nga pagsaulog sa tinuig nga Kaamulan Festival, ang Provincial Government of Bukidnon, pinaagi sa Provincial Events Committee, nagpagawas og lista sa mga angay ug dili angayang pagabuhaton sa mga partisipante ug bisita atol sa maong selebrasyon.
Sa pamahayag ni Fredelyn L. Ragandang Provincial Government of Bukidnon – Public Affairs Information & Assistance Office (PGO‑PAIA) Supervisor Officer IV, lakip sa gimando ang “Clean As You Go” o CLAYGO sa tibuok Kaamulan Park kung asa pinasikad sa Ordinance No. 1040, ginadili ang paglabay sa bisan unsang klase sa basura sama sa wrappers, upos sa sigarilyo, ug panit sa prutas sa publikong lugar ug kung walay basurahan, giawhag ang katawhan nga ibutang ang basura sa bulsa o bag.
Hugot usab ang pagdili pag-inom sa kalsada, sidewalk, ug publikong parke ingonman ang makit-an nga nag-inom sulod sa sakyanan nga naka-park sa maong lugar pagasilotan usab. Gibawal sab ang pagpahimutang sa camping tents, canopy, hammock, o picnic mats panahon sa mga dagkong aktibidad, ug uban pa sulod sa kaamulan Capitol Grounds.
Samtang adunay bag-ong Traffic Management Code sa syudad sa Malaybalay nga ipatuman aron malikayan ang kahuot sa dagan sa trapiko, ug hugtanong seguridad sa kapolisan sa dakbayan.
Alayon niini giawhag ang kooperasyon sa tanan aron magpabilin nga malipayon, malinawon, ug hapsay ang selebrasyon sa tibuok Kaamulan Festival.
