Giaprobahan sa 10th Sangguniang Panlungsod ang Ordinance No. 1075, Series of 2026 nga nag-adopt ug nagpatuman sa Republic Act No. 11261, nga nagtumong sa pagwagtang sa bayranan sa mga dokumentong gikinahanglan sa pagpangita og trabaho alang sa mga first-time jobseekers sa syudad sa Malaybalay atol sa 26th Regular Session niadtong Enero 13, 2026
Giduso ni Zoltan Dindo D. Dinlayan ang ordinansa, kung asa ang mga first-time jobseekers nga mangita og trabaho sa Malaybalay mahimong makakuha og libre nga mga dokumento gikan sa mga ahensya sa gobyerno nga kasagarang gikinahanglan sa aplikasyon sa trabaho, apan alang lamang sa ilang unang higayon nga pagpangita og trabaho.
Tumong sa ordinansa nga mapalambo ang serbisyo sa gobyerno ug matabangan ang mga aplikante, ilabi na ang kabatan-onan ug mga bag-ong graduate, aron dili na sila maglisod sa pagbayad sa mga dokumentong gikinahanglan sa pag-apply og trabaho.
Human sa makuting diskusyon hiniusang giuyonan sa konseho ang pag-apruba sa ordinansa, ug gipirmahan ni City Mayor Jay Warren R. Pabillaran niadtong Marso 3, 2026 alang sa implementasyon.
Tungod niini, gilauman nga mas mapadali ug mapagaan ang proseso sa pagpangita og trabaho sa mga first-time jobseekers sa Malaybalay City.
Photo Courtesy: SP Malaybalay
