Padayon karon ang gihimong manhunt operation sa mga otoridad batok sa usa ka suspek nga nalambigit sa ilegal nga pagpananom og marijuana sa lungsod sa Cabanglasan, Bukidnon. Kini human malampusong nakaikyas ang suspek atol sa gipahigayong dako nga operasyon sa kapulisan sa hilit nga bahin sa probinsya.
Sumala sa taho gikan kang Police Captain Sheila Joy Hangad spokesperson sa Bukidnon Police Provincial Office sa Exclosibong pakighinabi sa Juander Radyo Malaybalay, ang suspek usa ka residente sa Cabanglasan nga nailhan na sa kapulisan base sa ilang records. Bisan pa man sa paspas nga paglihok sa mga otoridad niadtong Pebrero 28, 2026, nakahigayon gihapon sa pagsibat ang suspek samtang gihimo ang operasyon sa Sitio Katablaran, Barangay Canangaan.
Sa maong operasyon, gibana-bana nga moabot sa usa ka libo (1,000) ka punoan sa fully grown marijuana ang na-uproot o na-ibot sa kapulisan. Ang matag punoan adunay gitas-on nga more or less lima ka tiil, ug ang market value niini gibana-banang mokantidad og Php200,000.
Aron maseguro nga dili na mapuslan pa, ang tanang nakumpiskang marijuana gidauban ug gihurot og guba diha mismo sa dapit sa operasyon, sa presensya sa usa ka Municipal Councilor sa Cabanglasan ug representante gikan sa media. Pipila ka mga sample ang gikuha ug gitunol ngadto sa PNP Forensic Unit sa Malaybalay alang sa laboratory examination.
Gipasalig karon sa kapulisan nga dili sila moundang hangtod nga madakpan ang maong suspek ug hingpit nga malimpyohan ang dapit gikan sa ilegal nga drugas.
Nagpabiling abli ang PNP sa bisan unsang impormasyon gikan sa publiko nga makatabang sa dinalian nga pagkasikop sa maong suspek.
Photo Courtesy: RDEU -10
