Nasunog ang usa ka balay human giingong nigamit og paaso sa paghadlok sa bitin, ang tag-iya nga sulod sa ilang panimalay alas 7 pasado sa buntag niadtong nakalabay nga adlaw, sa Purok Masagana, Antonio Luna St., Poblacion, Kabacan.
Sa inisyal nga mga taho, nagpaaso si Elma De Tomas apan sa wala damha nasunog kini ug daling mikatap ang kalayo sa tibuok balay nga gama sa light materials. Tungod niini, apektado usab ang silingang balay nga gipanag-iya ni Juliet Dalayuan.
Diin paspas usab nga gigamit ni Dalayuan ang iyang fire extinguisher aron mapugngan ang kalayo samtang nagresponde ang mga personahe sa Bureau of Fire Protection, USM Fire Brigade ug volunteer responders.
Sa karon, padayon pa ang BFP Kabacan sa ilang imbestigasyon aron masuta ang kinatibuk-ang damyos sa maong insidente. Subling gipahinumdoman sa ahensya ang publiko nga magmatngon ug mag-alerto batok sa sunog ilabi na karong Fire Prevention Month.
Photo Courtesy: Pitik ni Singkit
