Opisyal nang gi-turnover niadtong nakalabay nga adlaw, ang bag-ong Aquatic Center sa Bukidnon Sports Complex sa Barangay Laguitas, syudad sa Malaybalay atol sa ribbon cutting ug turn-over ceremony nga gitambongan sa mga opisyal sa probinsya.
Nangulo sa maong kalihokan si Juan Miguel “Migz” Zubiri uban si Rogelio Neil Roque, kauban nila Vice-governor Clive Quiño, City Mayor Jay Warren Pabillaran, ug mga kongresista gikan sa nagkalain-laing distrito sa Bukidnon.
Ang kinatibuk-ang kantidad nga mokabat sa kapin ₱302 milyon, ang maong pasilidad adunay 50-meter by 25-meter (10 lanes) nga swimming pool nga may giladmon hangtod walo ka tiil ug bleachers nga makalingkod og 1,024 ka manan-aw. Kumpleto usab kini sa mga area alang sa coaches ug officials, shower ug locker rooms, call rooms, public comfort rooms, ug uban pa.
Gipadayag ni senator Zubiri ang kalipay sa pagkahuman sa dugay nang gipangandoy nga proyekto alang sa mga batan-ong atleta sa Bukidnon, samtang nagpasalamat usab si Mayor Pabillaran sa garbo nga madala niini sa syudad sa Malaybalay.
Tumong sa Aquatic Center nga mahimong sentro sa training sa mga swimmers sa tibuok Mindanao ug makapahigayon sa dagkong kompetisyon sama sa Palarong Pambansa ug ubang regional sports competitions.
