Gilamoy sa kalayo ang duha ka panimalay niadtong nakalabay nga adlaw, sa P-6B, Sitio Mahayahay, Barangay Aglayan, Malaybalay City. Usa sa mga tag-iya ang nakuyapan human makadungog sa nahitabo. Sumala sa inisyal nga imbestigasyon, kusog ang pagdilaab nga maoy hinungdan sa dali nga pagkasunog sa duha ka balay.
Giila ang usa sa mga tag-iya sa balay nga hinimo sa amakan nga si Castura Atis Paran, 60-anyos kapin ang panuigon. Ang laing nadamay nga panimalay nga semi-kongkreto gipanag-iyahan ni Romireca Ferolino, kapin 30-anyos ang edad.
Sa eksklusibong pakighinabi sa Juander Radyo Malaybalay ngadto sa mama ni Romiraca, matod niya nga nagsugod ang kalayo sa balay nga hinimo sa light materials ug dali kining mikatap paingon sa iyang anak tungod sa kakusog sa pagdilaab.
Samtang nagdilaab ang kalayo, anaa pa sa sulod sa balay si Ferolino kauban ang iyang duha ka anak, lakip ang napulo ka bulan nga bata. Dali silang nakagawas ug gikugos ang bata sa inahan, apan wala nay nasalbar nga mga gamit. Gidugang sa report nga si Paran nakuyapan human makabalita sa insidente ug gidala dayon sa ospital alang sa medikal nga atensyon.
Gipasabot sab ni FO3 Brent Clyde Suico, Media Relations Officer sa Malaybalay City Fire Station, nga nakaapekto sa ilang pagresponde ang pipila ka mga sakyanan ug motorsiklo nga wala mopadaplin bisan naka-on na ang emergency alert sa fire truck, hinungdan sa pagkalangan sa pag-abot sa lugar, busa kusganon niining giawhag ang katawhan nga kanunay magbinantayon ug magpakabana.
Padayon karon ang gihimong imbestigasyon sa BFP – Malaybalay City pagsuta sa tinunbdan sa sunog ug pila ang kinatibuk-ang damyos niini.
