Mapasalamaton ang National Commission on Indigenous Peoples (NCIP) Bukidnon kang Senator Juan Miguel Zubiri tungod sa paghatag og prayoridad sa panginabuhian sa mga Lumad sa Lalawigan.
Sumala ni Ronaldo L. Baya-on, Acting Provincial Officer sa NCIP sa exclusibong pakighinabi sa Juander Radyo Malaybalay ang pokus sa senador mao ang pagpalambo sa community-based livelihood programs alang sa Indigenous Peoples (IP), diin ang mga Indigenous Peoples Mandatory Representatives (IPMRs) giaghat nga magpahigayon dayon og mga miting uban sa ilang tribal ug traditional leaders aron sila mismo ang makaila sa tinuod nilang panginahanglan sa ilang tasa-tagsa ka lugar.
Gipasiugda nga ang mga IPMR kinahanglan makapasa og project proposal hangtod Marso 21, isip kabahin sa mga kinahanglanon aron maaprobahan ang pundo. Aduna nay pipila ka IPMR nga miduol sa opisina sa NCIP aron mangayo og giya sa paghimo sa ilang mga proposal.
Sumala sa NCIP, ang sustainable livelihood program mahimong usa sa mga lakang aron matubag ang kakabos pinaagi sa paghatag og kapital ug dugayng panginabuhian nga makahatag og mas lig-on nga kita sa matag pamilya.
