Hugot nga gimonitor karon sa Department of Migrant Workers (DMW) ug sa nagkalain-laing embahada ang kahimtang sa mga Overseas Filipino Workers (OFWs) sa Middle East taliwala sa nagpadayong kagubot sa rehiyon.
Sumala sa report, gipatuman karon ang “work from home” nga setup alang sa daghang mga trabahante samtang ang uban gidid-an una sa paggawas sa ilang mga puy-anan alang sa ilang seguridad samtang gipahimutang na usab sa mga temporary shelter kadtong mga OFW nga nagtrabaho duol sa mga US bases nga maoy giingong nag-unang target sa Iran.
Bisan pa man sa tinguha sa uban nga mouli na sa Pilipinas, gipahibalo sa tinubdan nga dili pa hingpit nga makasugod sa repatriation tungod sa pagsirado sa mga airspace sa maong mga nasod.
Sa eksklusibong pakighinabi sa Juander Radyo Malaybalay kang Emmanuel G. Toledo ang Regional Director sa Department of Migrant Workers Region-X sa pagkakaron, upat ka mga dapit ang ubos sa Alert Level 4 (Mandatory Repatriation), Gaza, Syria, Yemen, Iran samtang ubos sa Alert Level 3 (Voluntary Repatriation) ang Iraq ug Lebanon ug aron masiguro ang paspas nga pagtubag sa panginahanglan sa mga pamilya, gi-activate na ang upat ka mga hotlines ug ang One Repatriation Command Center #1348 (available 24/7)
Nakig-alayon na usab ang ahensya sa mga Local Government Units (LGU) aron maandam ang gikinahanglang contingency plans sa higayon nga magsugod na ang dinagko nga pagpaupauli sa mga trabahante.
Gikumpirma sa opisyal nga base sa ilang rekord niadtong 2025, adunay kapin 50,000 ka mga OFW gikan sa Northern Mindanao ang nadeploy, diin kapin sa 31,000 niini ang kasamtangang anaa sa Middle East
Photo Courtesy: DMW
