Gipadayag nga taas pa kaayo ang proseso ug dugay pa ang pagdungog sa mga alegasyon ug kaso batok kang kanhi Presidente Rodrigo Roa Duterte sa International Criminal Court (ICC), bisan pa man og nasugdan na kini sa milabayng adlaw.
Sa eksklusibong pakighinabi sa Juander Radyo Malaybalay, giklaro ni Ramon Belino, usa ka political analyst, nga hangtod karon wala pa’y confirmation of charges batok kang Rodrigo Duterte. Matod pa niya, gitimbang pa sa ICC kung adunay igo ug supisyenteng ebidensya aron pormal nga kasuhan ang kanhing pangulo.
Gipasabot usab ni Belino nga sa kasamtangan, ginatest pa kung angayan ba gyud nga ipadayon ang kaso, ug wala pa makab-ot ang yugto sa pormal nga pagkompirma sa mga kaso.
Sa pangutana kon kini ba pamolitika o dili, giingon niya nga posible nga adunay balidong basihan ang mga reklamo nga may kalabutan sa giingong krimen batok sa katawhan, apan dili usab malikayan nga adunay posibilidad nga nasudlan kini og pamolitika.
May kalabutan sa imahe sa Pilipinas sa ubang nasud, gikabutyag niya nga sa karon wala pa’y klarong epekto ang nagpadayon nga proseso sa ICC, ug wala pa’y dakong reaksyon gikan sa ubang mga nasud kabahin sa pagdungog sa kaso batok sa kanhing Presidente.
Bisan pa niini, nagpadayon ang diskurso ug pagmonitor sa kalamboan sa maong isyu samtang naghulat ang publiko sa sunod nga lakang sa ICC.
