Miatubang sa publiko ang 18 ka kanhing sundalo aron ibutyag ang giingong maanomalyang implementasyon sa mga flood control projects sa nasud.
Sa usa ka press conference, gipaila-ila ni Levi Baligod, abogado ug nailhang whistleblower sa pork barrel fund scam case nga nalambigit kang Janet Napoles, ang mga kanhing sundalo nga matod pa nakasaksi sa paghatod og mga maleta nga dunay sulod nga kuwarta ngadto sa nagkalain-laing opisyal sa gobyerno.
Gikumpirma sa mga nasampit ang nahimong pahayag ni Orly Guteza atol sa pagdungog kaniadto sa Senate Blue Ribbon Committee kalabot sa pagdala og mga maleta nga adunay sulod nga kuwarta ngadto sa balay ni kanhing House Speaker Martin Romualdez.
Gawas kang Romualdez, giingon nga naghatod usab sila og kuwarta ngadto kang Pangulong Ferdinand R. Marcos Jr., ug uban pang opisyal lakip si kanhing Stella Quimbo, nga nagserbisyo isip representante sa Marikina 2nd District.
Sumala sa mga nagpakita, mokabat sa P805 bilyon ang giingong kantidad nga nadeliver ngadto sa nagkalain-laing opisyal, nga matud pa gikan sa mga kickback sa flood control projects. Gipresenta usab nila ang mga litrato sa mga maleta nga giingong gihatod sa balay ni Quimbo, nga dunay sulod nga nagkantidad tali sa P15 milyon hangtod Php70 milyon matag usa.
Si Quimbo kabahin sa bicameral conference committee ug nagsilbing puli ni kanhing Zaldy Co, representante sa Ako Bicol Party-list, isip chairperson sa House Committee on Appropriations atol sa deliberasyon sa 2025 national budget.
Sa pagkakaron, wala pa’y opisyal nga pahayag gikan sa mga ginganlan kalabot sa maong mga alegasyon. Padayon pang ginapaabot ang ilang panig-ingnan samtang nagpadayon ang imbestigasyon sa isyu.
Photo Courtesy: SENATE
