Patay ang usa ka pastor nga giila si Francisco Barajah human misulay sa pagpuasa aron sundon ang 40 ka adlaw nga fasting nga gihimo ni Jesus Christ isip porma sa debosyon sa Ginoo.
Sumala sa report, plano unta ni Barajah nga makompleto ang 40 ka adlaw nga walay kaon. Apan miabot lamang siya og 25 ka adlaw nga wala gyud siyay gikaon ug wala usab miinom bisan tubig, nga misangpot sa grabeng kahuyang ug pagniwang.
Sa wala pa siya namatay, gi-diagnose siya og acute anemia ug wala pag function sa iyang digestive organs — mga kondisyon nga direktang resulta sa dugay nga kakulang sa pagkaon ug tubig.
Matod sa mga medical findings, ang grabe nga dehydration ug malnutrition maoy hinungdan sa paghunong sa normal nga paglihok sa iyang internal organs. Sa mga hulagway nga mikaylap sa social media, makita ang grabeng kaniwang sa pastor tungod sa taas nga panahon nga walay kaon ug pag-inom sa tubig.
Nagpahimangno ang mga health experts nga delikado ang sobra o extreme fasting, ilabi na kon walay pag-inom og tubig. Ang lawas sa tawo nagkinahanglan og igo nga sustansya ug likido matag adlaw aron magpabiling himsog ug malikayan ang seryosong komplikasyon sa panglawas.
Photo Courtesy: LTA
