Padayon nga gipreserbar sa tribong Manobo sa lungsod sa Quezon ang ilang kultura pinaagi sa matag tuig nga pagsaulog sa Sunggod Teh Kamanga Festival nga gihimo niadtong Pebrero 22 hangtod 24, 2026.
Sumala ni Datu Alagasi Alexander Mansaluon, Indigenous Peoples Mandatory Representative (IPMR) sa Barangay Lumintao ug IP Sports Coordinator, kini na ang ika-17 ka tuig nga ilang panagtagbo gisugdan pinaagi sa usa ka ritwal isip pag-andam sa tibuok tuig nga maayong abot sa ilang umahan ug pagpasalamat sa mga panalangin.
Dugang ni Datu Mansaluon nga ang festival gihimo aron ipasidungog, ipasigarbo, ug mapreserbar ang kultura sa tribo pinaagi sa nagkalain-laing kalihokan sama sa mga ritwal, sayaw, ug tradisyonal nga dula. Lakip niini ang Patukaw Ritual, Sayaw Te Dalan, Panalabugta, Wakis, Panampulot, ug Kikiyab Tingkik o tradisyonal nga paghimo og kalayo. Gisundan kini sa Kasabekaan ne Sayaw o Tribal Mass Dancing ug Tribal Fest sa matag payag.
Sa mensahe ni Municipal Mayor Pablo Lorenzo III o mas nailhan nga “Poling,” iyang gipasiugda ang kamahinungdanon sa panaghiusa tali sa nagkalain-laing tribo ug kultura sa lungsod. Matud niya, ang Quezon nagbarug isip usa ka komunidad nga nagtinabangay alang sa kaayohan sa tanan — Manobo man, Dumagat, Ilonggo, o Bisaya — diin kini kahigayunan sa usa, kahigayunan para sa tanan.
Giila usab sa mayor ang tribo isip pundasyon sa identidad ug kalamboan sa lungsod. Busa, padayon ang suporta sa administrasyon sa mga programa ug kalihokan nga nagpalig-on ug nagpreserbar sa kultura ug tradisyon aron mapadayon ang buhi ug malamboong kultura sa Quezon.
Samtang, gipasiugda usab ni IPMR Datu Elmer Lilawan nga ang selebrasyon usa ka paagi sa pagpakita sa buhi ug lumadnong kultura sa tribo. Matud pa niya, gihimo kini dili aron makadani og atraksyon, kundili aron ipadayag ug ipadayun ang ilang kultura ug tradisyon sa lungsod.
Photo Courtesy: LGU Quezon
