Desidido mopasaka ug kaso ang grupo sa tribong Talaandig nga lumad batok sa mga otoridad human gidakop ug gipriso ang tulo ka magsuon nga miyembro sa ilang grupo niadtong Pebrero 21, 2026, sa Purok 5, Barangay Dalwangan Malaybalay City
Ang maong grupo gikaingong misulod ug nagclaim sa yutang giingong sakop sa Department of Agriculture – Bureau of Animal Industry National Artificial Breeding Center nga nahimutang sa maong lugar.
Sa eksklusibong pakighinabi sa Juander Radyo Malaybalay, si Norberto Gulinsao Sr. o Datu Mansomanta sa tribung Talaandig miingon nga ilang gisudlan ang luna tungod kay matod pa nila na-award na kini ug mahimo na nilang bahinbahinon matag pamilya pinasikad sa ilang dayalugo kauban si Datu Makayuba, ang bag-ong napiling IPMR sa Bukidnon.
Gipatin-aw usab ni Gulinsao ang ilang basehan ang Indigenous Peoples’ Rights Act of 1997 o IPRA Law ubos sa RA 8371 ug adunay ilang gihawiran nga titulo ug deklarasyon nga nagpakita sa ilang pagpanag-iya sa yuta nga matod pa nila kabilin pa sa ilang mga katigulangan.
Dugang pa niya, ang tulo ka mag-igsoon nga gidakop giakusahan sa mga otoridad nga nangharas ug giingong “iskwater,” apan iyang gilimod ang maong alegasyon ug miingon nga wala sila nang-iskwat kondili nag-angkon lamang sa yutang ilang gituohang ancestral domain.
Sa pagkakaron, nagpadayon ang ilang pagpangandam sa legal nga lakang samtang nagpaabot pa sa pahayag sa Department of Agriculture ug sa kapulisan kabahin sa insidente.
