Naibtan na matod pa ug tunok ang Philippine Drug Enforcement Agency Regional Office 10 human malampusong natuman ang public auction sa nakompiskang hydrochloric acid sa ilang opisina sa El Salvador City.
Ang 320 drums sa hydrochloric acid gikompiskar niadtong 2017 sa Tagoloan Port, import gikan sa India. Ang upat ka van nga naglangkob sa kemikal una nga gikustodiya sa Bureau of Customs, ug sa ulahi gibahin ngadto sa upat ka lot numbers alang sa public bidding.
Ang mga bidders gipaubos sa makuti nga evaluation process. Lima ang mipasar sa kwalipikasyon, samtang tulo ang opisyal nga nahimong buyers.
Sale Lot No. 001-2026 – SevenSeas
Sale Lot No. 002-2026 – Viman Marketing
Sale Lot No. 003-2026 – Viman Marketing
Sale Lot No. 004-2026 – Tanduay
Sumala kang Alex M. Tablate, Regional Director sa PDEA-10, dili praktikal ang pag-destroy sa mga kemikal tungod kay mokabat og tunga sa milyon ka pesos ang magasto sa destruction process. Pinaagi sa public auction, nakatigom ang ahensya og kapin 50 mil pesos gikan sa confiscated chemicals, diin ang proceeds ipasulod sa National Treasury.
Gipasalig usab sa PDEA-10 nga magpabilin ang hugot nga monitoring sa mga nakapalit sa hydrochloric acid aron masiguro nga kini magamit lamang sa legal ug lehitimong katuyoan, subay sa balaod ug regulasyon nga nagdumala sa mga controlled chemicals.
