Gipatin-aw karon sa LGU Bukidnon kauban ang mga nagdumala sa Northern Mindanao Regional Athletics Association (NMRAA) nga dili magkulang sa suplay sa tubig alang sa mga atleta nga mosalmot sa umaabot nga Regional Athletics Meet dinhi sa probinsya.
Kini nga pahayag gisubay sa nagpadayon nga water crisis sa Malaybalay City, diin ipahigayon ang maong kalihukan.
Sa eksklusibong pakighinabi sa Juander Radyo Malaybalay, gipadayag ni Said Macabago, Information Officer sa DepEd Bukidnon Division, nga dili mamroblema sa tubig ang tibuok aktibidad tungod kay andam motabang ang mga kasikbit nga lokal nga panggamhanan.
Matod pa niya, ang mga munisipyo sa Lantapan, Sumilao, Impasug-ong ug ang Valencia City andam mopagamit sa ilang mga water tank aron masiguro ang igo nga suplay sa tubig alang sa mga atleta ug opisyal sa palaro.
Dugang pa, nagpagawas usab ug pundo si Jay Warren Pabillaran aron masuportahan ang panginahanglanon sa maong kalihokan. Nakigkoordinar usab ang LGU sa Provincial Fire Marshal aron makatabang sa paghatod ug dugang suplay sa tubig kon gikinahanglan.
Kahibaloan nga ang Regional Athletics Meet 2026 ipahigayon sa Bukidnon Sports Complex Barangay Laguitas, Malaybalay City sugod karong Marso 18 hangtod Marso 24, 2026.
Gipasalig sa mga opisyal nga bisan pa sa kasamtangang kakulang sa tubig sa dakbayan, andam ang tanang ahensya nga motabang aron masiguro ang hapsay, luwas ug malampusong pagdumala sa regional nga pangpaugnat sa kusog sa Northern Mindanao.
Photo Courtesy:LGU Bukidnon
