Gipakita na sa publiko pinaagi sa National Mapping and Resource Information Authority (NAMRIA) ang opisyal nga administrative map sa Pilipinas diin klaro na nga gipakita ang West Philippine Sea (WPS). Sumala sa ahensya, kining maong mga opisyal nga mapa ug nautical charts mahinungdanon kaayo sa paghingusog ug pagpanalipod sa maritime jurisdiction sa nasod sa WPS.
Gipasabot sa NAMRIA nga sukad pa niadtong 2012, ubos sa administrasyong Aquino, pormal na nga gigamit ang terminong “West Philippine Sea” sa mga publikasyon ug padayon kini nga gibutang sa tanang opisyal nga mapa.
Ang maong mga materyales gigamit sa mga mariners, researchers, ug nagkalain-laing institusyon para sa luwas nga nabigasyon ug geographic information.
Base sa Republic Act 9522, ang exclusive economic zone (EEZ) sa Pilipinas moabot og 200 nautical miles gikan sa archipelagic baselines.
Gipasalig sa NAMRIA nga ang ilang mga datos subay sa international hydrographic standards ug nakasumite sa mga international technical bodies aron malakip ang impormasyon sa Pilipinas sa tibuok kalibutan nga maritime record.
Kini nga lakang kabahin sa mandato sa ahensya sa paghatag og saktong geospatial information nga magsuporta sa soberanya sa nasod ug saktong pagdumala sa mga natural nga hinguhaan.
Photo Courtesy: The Filipino Times
