Gikompirmar sa mga organizers nga anaa na karon ang mga preparasyon alang sa Kaamulan Festival 2026, diin ang kagamhanang probinsyal naglunsad og usa ka bulan nga serye sa mga kalihokan nga naglakip sa street dancing, float competitions, ug ground presentations nga moapil sa siyam ka local government units (LGUs).
Magtigi karong tuiga mao ang mga syudad sa Malaybalay ug Valencia, ug ang mga lungsod sa Maramag, Talakag, Malitbog, Don Carlos, San Fernando, Manolo Fortich, ug Kalilangan.
Sumala kang Provincial Tourism Administration Officer Goldie Buhawi, gilauman nga labi ka grabe ang kompetisyon tungod kay daghan sa mga LGUs nga partisipante kaniadto nang nakadaug sa mga miaging kalihokan sa Kaamulan. Aron suportahan ang partisipasyon, nigahin ang kagamhanang probinsiyal og ₱1.3 milyon nga subsidy sa matag municipal contingent, gawas lang sa duha ka siyudad nga dili apil sa subsidy tungod sa lig-on nilang lokal nga kita ug badyet.
Dako usab ang nadugang nga premyo sa 2026: ₱300,000 alang sa street dancing champion, ₱200,000 alang sa float competition winners, ug ₱150,000 alang sa ground presentation winners—halos doble kumpara sa miaging tuig.
Mokabat sa 400 ka concessionaires, lakip ang food vendors, souvenir sellers, ug ornamental plant exhibitors, ang mopailawom sa Filipino Brand of Service Excellence (FBSE) training ubos sa Department of Tourism (DOT). Ang inisyatiba nagtumong sa pagpataas sa Kaamulan ngadto sa usa ka “world-class festival” nga maka-attract sa lokal, nasyonal, ug langyaw nga mga turista.
Sa Pebrero 16, gisugdan ang selebrasyon pinaagi sa ‘Panandig Ha Pamuhat’ (ritwal), nga nagtimaan sa seremonyal nga pagsugod sa Kaamulan ug sa pagtukod sa mga light-material booths nga nagpakita sa lainlaing produkto ug serbisyo diin ang garden show magsugod sa Marso 1 hangtod Abril 30, ug ang street dancing, float competition, ug ground presentations sa Abril 18, 2026
Photo Courtesy: LGU BUKIDNON
