Gipalig-on sa mga ahensya sa gobyerno ilabi na sa DTI ang information campaign isip kabahin sa pagsaulog sa World Consumer Rights Day karong Marso 2026, nga magpunting sa pagpanalipod sa mga konsumidor ug paglikay sa pagpalit og delikado ug substandard nga produkto.
Sumala ni Junar Merla Chief sa Consumer Protection Division sa DTI BUKIDNON nga magsugod na ang nagkalain-laing aktibidad bisan sa unang semana pa sa Marso isip pagpangandam sa opisyal nga selebrasyon matag Marso 15 kung asa apil sa palapdan nga kampanya ang paghatag og impormasyon pinaagi sa radyo, social media, ug mga forum nga may kalabotan sa consumer education ug advocacy.
Kini ang gipadayag ni Junar Merla sa exclusibng pakighinabe sa Juander Radyo Malaybalay, diin ipasiugda sa kampanya ang hustong pagtan-aw sa kalidad sa mga produkto ilabina sa pagpalit og fire extinguishers aron malikayan ang paggamit sa substandard nga kagamitan, lakip na usab ang pag-inspeksyon sa mga appliances aron masiguro ang kaluwasan sa panimalay.
Lakip sa mga kalihokan ang Retailers Forum ug “Kapihan” uban sa mga retailers sa Bukidnon nga pagahimoon sa Valencia City, nga maoy usa sa pinaka-highlight sa selebrasyon.
Ang tema karong tuiga mao ang “Safe Products, Confident Consumer,” nga nagpunting sa pagpalig-on sa mga safety measures aron maprotektahan ang katawhan ug mapataas ang kahibalo sa mga konsumidor sa husto ug luwas nga pagpamalit
Photo Courtesy: DTI
