Mag-atubang og kaso sa Reckless Imprudence Resulting in Double Homicide, Double Physical Injuries, ug Damage to Property ang driver sa usa ka trailer truck human niini nabanggaan ang usa ka motorsiklo karong Pebrero 18, 2026, pasado alas 10:40 sa buntag sa National Highway, Purok -1, Barangay Palacapao lungsod sa Quezon
Sa eksklusibong pakighinabi sa Juander Radyo Malaybalay, giingon ni Police Corporal Eugene Tanate, traffic investigator sa Quezon Municipal Police Station, nga ang mga napatay nga biktima usa ka magtiayon nga anaa sa legal nga edad samtang samara ilang 7-anyos nga anak lalaki ug 3-anyos nga pag-umangkon nga babaye, pulos lomulopyo sa Kitaotao, wala sab hinganli, ang truck driver kinsa empleyado sa usa ka dakong kompanya.
Sumala sa imbestigasyon, nagbiyahe ang duha ka sakyanan sa magkaatbang nga direksyon—ang motorsiklo padulong sa Kitaotao, samtang ang trailer truck padulong sa Dangcagan. Sa dapit nga nahitabo ang aksidente, nasuta nga miagi ang truck sa madanlog nga bahin sa dalan, hinungdan nga nakawat kini sa wala nga linya ug direkta nga nabanggaan ang motorsiklo.
Tungod sa kakusog sa impact, nakaangkon og grabeng samad ang magtiayon ug miresulta sa ilang hinanaling kamatayon. Ang duha ka bata dali nga gidala sa ospital sa Cagayan de Oro tungod sa mga bali nga naangkon sa ilang lawas.
Sa pagkakaron, anaa na sa kustodiya sa Quezon PNP ang driver ug ang mga sakyanan alang sa dokumentasyon ug tukmang disposisyon. Ang kapulisan nagpahimangno usab sa tanang motorista nga mag-amping kanunay sa pagbiyahe, ilabi na sa mga dapit nga madanlog ang dalan, aron malikayan ang susamang trahedya.
Photo Courtesy: Quezon Municipal Police Station
