Nagpasaka og kasong cyber libel ug uban pang may kalabutan nga reklamo ang National Bureau of Investigation (NBI) batok nila Jay Sonza ug Jeffrey Celiz o mas nailhan nga “Ka Eric Celiz,” sa giingong pagpakatap og peke nga medical records ni Pangulong Ferdinand Marcos Jr.
Base sa NBI, nagpahigayon og cyber-surveillance ang ilang Cybercrime Division niadtong bulan sa Enero ug ilang namatikdan ang mga post niadtong Enero 28 ug 29 nga naglangkob matod pa og CT-scan report ug mga hulagway sa Pangulo.
Ang maong mga post nagkuwestiyon sa iyang “fitness for duty” ug nagpasabot nga nagkagrabe ang iyang kahimtang sa panglawas. Bisan pa og adunay mga post nga gidelete o gilimitahan na, napanalipdan gihapon sa mga imbestigador ang mga ebidensya pinaagi sa digital forensics.
Nasubay niini ang pagkatag sa maong content sa social media lakip na sa YouTube. Girekomenda sa NBI ang pagsaka sa kaso ubos sa Section 4(c)(4) sa Cybercrime Prevention Act of 2012 ug Article 154 sa Revised Penal Code ngadto sa Department of Justice.
Gipasiugda ni Angelito Magno, Director sa NBI, nga bisan protektado ang kagawasan sa pagpahayag, dili kini angay gamiton sa pagpakalat og sayop o makadaot nga impormasyon nga mahimong makaguba sa dungog sa usa ka tawo ug makapahuyang sa pagsalig sa publiko.
Photo Courtesy: Daily Tribune
