Gihingusgan sa Philippine National Police (PNP) ang ilang kampanya batok sa mga sindikato nga nalambigit sa pagbaligya og bata pinaagi sa social media, human sa pagsaka sa mga kaso sa baby-selling sa nasud.
Matod kang PNP chief Gen. Jose Melencio Nartatez Jr., ilang gipunting nga dili lamang ang mga lokal nga grupo kundili apil na ang mga international crime rings nga gituohang nag-organisa sa human trafficking schemes.
Gipalihok na usab ang mga specialized police units aron bungkagon ang mga network nga nalambigit sa online baby-selling. Sumala sa datos sa Women and Children Protection Center (WCPC), adunay mga nasagip nga mga masuso atol sa anti-trafficking operations nga gipahigayon gikan Pebrero 2 hangtod 4.
Gibutyag sa WCPC nga ang ubang mga masuso gibaligya sa kantidad nga mokabat lamang og P10,000.
Matod ni Nartatez, usa kini ka maka alarma nga illegal nga kalihokan nga kinahanglan mapahunong tungod kay nagdaot kini sa bili ug kahalangdon sa kinabuhi sa tawo.
Dugang pa niya nga ang PNP mosang-at og mga kasong kriminal batok sa social media platforms nga mapakyas sa paghimo og aksyon batok sa pagbaligya sa mga bata sa digital platforms.
Photo courtesy: manilastandard
