Misaka na sa US$7.1 bilyon ang kinatibuk-ang net foreign direct investments (FDI) nga nisulod sa Pilipinas gikan Enero hangtod Nobyembre 2025. Base kini sa gipagawas nga datos sa Bangko Sentral ng Pilipinas (BSP), nga nagpakita sa lig-on nga pagsalig sa mga langyawng negosyante sa ekonomiya sa nasod.
Alang sa bulan lamang sa Nobyembre 2025, nakatala ang nasod og net inflows nga nagkantidad og US$897 milyon. Migawas sa report nga ang South Korea ang nahimong nag-unang gigikanan sa pondo, diin ang dakong bahin sa ilang puhonan gibubo sa manufacturing industry.
Sa kinatibuk-ang panahon sa unang napulog-usa ka bulan sa tuig, gawas sa South Korea, gikan ang bulto sa equity capital placements sa Japan, United States, ug Singapore. Ang mga nisulod nga kapital nag-unang gigahin sa pagpalambo sa manufacturing, wholesale and retail trade, ug real estate.
Sumala sa mga eksperto, ang padayong paglig-on sa FDI, labing mahinungdanon sa pagpadali sa produksyon ug pag-abli sa mas daghang oportunidad sa trabaho sa nasod.
Photo courtesy: Manila Standard
