Palapdan sa Department of Agriculture (DA) ang “Benteng Bigas, Meron Na” program sa Metro Manila aron mas daghang mga kabus ug huyang nga sektor ang makabenepisyo sa Php20 matag kilo nga bugas.
Matod ni Agriculture Secretary Francisco Tiu Laurel Jr., target sa ahensya nga makatukod ug dili mominus sa lima ka Php20 nga rice outlets sa matag lokal nga kagamhanan sa National Capital Region.
Tumong niini nga madala ang barato nga bugas sa katawhan ug maminusan ang gasto sa mga pamilya.
Gibutyag ni DA-Agribusiness and Marketing Assistance Service Director Junibert de Sagun nga ang bug-os nga pagpalapad sa programa nagtumong sa dili pa mahuman ang Marso 2026 aron madugangan sa panahon sa ting-ani ug masiguro ang igong suplay.
Prayoridad sa programa ang mga senior citizens, single parents, persons with disabilities, 4Ps beneficiaries, minimum wage earners, TODA members, mag-uuma, mangingisda ug uban pang mga kwalipikadong grupo.
Nakigtagbo usab ang DA sa Metropolitan Manila Development Authority (MMDA) ug mga lokal nga kagamhanan sa Metro Manila aron mapadali ang pagpatuman, samtang ang MMDA misaad og suporta sa logistics ug monitoring sa programa.
Photo Courtesy: DA
