Giklaro sa City Disaster Risk Reduction and Management Department o CDRRMD sa Lokal nga Pangagamhanan sa Cagayan de Oro nga adunay siyentipiko ug factual nga basehan ang syudad sa dili pa magdeklara og suspensyon sa klase ug trabaho panahon sa mga weather disturbances.
Kini human nga gibatikos sa social media ang syudad sa miaging mga weather disturbances tungod sa nalangan nga pagdeklara og suspensyon sa klase ug trabaho, bisan pa nga ang ubang silingang lokal nga pangagamhanan nakapahibalo na og suspensyon.
Sumala ni CDRRMD Head Nick Jabagat, adunay igo nga manpower ug resources ang syudad sa pagmonitor sa kahimtang sa panahon, lebel sa tubig sa suba, mga flood-prone nga barangay, ug uban pang risgo aron masuta kung angayan na ba ang suspensyon.
Gipasabot usab ni Jabagat nga daghang aspeto ang ginakonsiderar sa lokal nga pangagamhanan sa pagpanguna ni Mayor Rolando “Klarex” Uy sa dili pa maghimo og desisyon, lakip na ang posibleng epekto niini sa nagkadaiyang sektor sa syudad ug ang kaluwasan sa mga estudyante ug mamumuo.
Photo courtesy: CDRRMD – Oro Rescue
