Gi-certified as urgent ang ordinansa nga mosagop sa kamanduan sa DILG kalabot na sa pagpatuman sa Anti-Epal Policy.
Sa nilabayng sesyon, giaprubahan sa ikaduhang pagbasa ang City Ordinance no 2026-196 nga nahisubay sa DILG Memorandum Circular No. 2026-006, nga nagmando sa hugot nga pagbawal sa pagbutang og mga hulagway, logo, color o pangalan sa mga politiko sa tanang proyekto, programa ug imprastraktura nga giponduhan sa gobyerno.
Ayha nakapasa ang ordinansa, nagpaabot sa iyang mga pangutana ug pagpaklaro si Konsehal Aga Suan mahitungod sa implementasyon sa Anti-Epal Policy labi pa nga sa syudad adunay mga proyekto ug programa nga nakapangalan sa Mayor sama nalang sa Klarexville socialize housing ug programa nga Klarex nga Serbisyo.
Tubag ni Konsehal Edgar Cabanlas, gina-review na kini og ginatuki ang legalidad sa uban pang mga programa.
Samtang gipaabot sab ni Konsehal Marlo Tabac nga naghimo na og lakang ang mismong Mayor aron nga mutuman sa Anti-Epal Policy, lakip na ang pagmando sa City Engineering Office sa pagtangtang sa iyahang mga pangalan ug political color.
Photo courtesy: Cagayan de Oro City Council
