Gipatuman sa Provincial Government of Bukidnon (PGB), pinaagi sa Pre-Disaster Risk Assessment (PDRA) Scenario Building Process ang Bravo o medium risk nga Emergency Preparedness & Response (EPR) Protocol, isip pagpangandam sa Tropical Depression “Basyang”, nga posibleng mabatian o masinati sa Northern part sa probinsya karong adlawa, Pebrero 5-6, 2026.
Kini nauyonan atol sa gipahigayon nga meeting sa PDRA Team kagahapon, Pebrero 4, 2026 sa National & Provincial Offices Building, Capitol Compound, Malaybalay City, Bukidnon.
Alayon niini, gideklara na sa LGU Valencia City, San Fernando, Maramg ug Sumilao ang suspension of classes sa tanang level karong adlawa samtang mipakanaog sab ug pagsuspenso sa klase ang Department of Education – Bukidnon subay sa DepEd Order No. 022, s. 2024, kung asa ang mga tinun-an, ginikanan, ug school heads gitambagan nga magpabiling updated pinaagi sa ilang tagsa-tagsa ka LGU official channels ug uban pang opisyal nga advisories, ug unahon ang kaluwasan sa tanang panahon.
Nasayrang base sa latest weather bulletin sa PAGASA, sakop sa signal number 2 ang northern portion sa Bukidnon (Impasug-Ong, Manolo Fortich Malitbog, Sumilao, Libona, Baungon, Cabanglasan ug syudad sa Malaybalay) samtang ang ubang bahin sa probinsya ubos sa Signal number 1
Niini nga panahon, makasinati ang pipila ka bahin sa probinsya sa posibleng kusog nga hangin ug ulan nga posibleng magresulta sa landslide ug baha, Busa gi-awhag ang publiko, ilabina niadtong anaa namuyo daplin sa sapa, nga magpabiling alerto ug kanunay’ng magsunod sa mga pahimangno gikan sa C/MDRRMO alang sa posibleng pagbakwit.
