Gibasura sa House Committee on Justice ang duha ka reklamong impeachment batok kang Presidente Ferdinand “Bongbong” Marcos Jr., human makuha sa mayorya sa mga myembro ang konklusyon nga walay igo ug lig-on nga substansiya ang mga alegasyon aron ipadayun sa plenaryo sa Kamara.
Sa botong 42-3-1, giuyonan sa komite nga “insufficient in substance” ang reklamo ni Atty. Andre de Jesus, nga giendorso ni Rep. Jett Nisay, tungod sa kakulang sa klarong ebidensiya ug ligal nga basihan.
Sa laing magkabulag nga botohan, giibasura usab ang ikaduhang reklamo nga gi-file sa Makabayan bloc, nga nagpasangil og “betrayal of public trust” may kalabutan sa giingong dili patas nga alokasyon sa pondo para sa mga infrastructure projects. Sa maong botohan, 39 ka myembro ang misupak samtang 7 lamang ang misuporta sa pagpadayon sa reklamo.
Nahinumduman nga niadtong Pebrero 2, giila sa komite nga “sufficient in form” ang duha ka reklamo, apan sa lawom nga deliberasyon, napamatud-an nga kulang kini sa lig-on nga ebidensiya ug konkretong kamatuoran aron mosulod sa sunod nga hugna sa impeachment process.
Sumala sa pipila ka myembro, ang impeachment usa ka seryoso ug bug-at nga mekanismo sa Konstitusyon nga dili angay gamiton kung walay lig-on ug matuod nga basihan. Gihatagan-diin nila nga responsibilidad sa Kamara ang pagsiguro nga dili mahimong politikal nga armas ang proseso.
Ang desisyon sa komite nagpakita sa dakong babag nga giatubang sa mga grupo nga naningkamot magpahawa sa Presidente pinaagi sa impeachment, ilabi na karon nga ang kadaghanan sa mga myembro sa ubos nga balay-balauranan nagasuporta sa administrasyon.
Photo Courtesy: PNA
