Duha ka bag-ong impeachment complaint ang gisumite niadtong Lunes batok kang Vice President Sara Duterte. Gisumite ang unang reklamo sa mga miyembro sa Makabayan Coalition ug gi-endorso sa Makabayan bloc ngadto sa Office of the Secretary General sa House of Representatives.
Sumala kang kanhi Bayan Muna representative Neri Colmenares, ang reklamo may kalabutan sa paggamit sa confidential funds sa Office of the Vice President. Matod usab kang kanhi ACT Teachers party-list representative France Castro, nagtuo sila nga natraidor ang pagsalig sa katawhan, ilabina human sa mga hearing sa 19th Congress bahin sa maong pondo.
Ang reklamo nagpasangil og gross abuse of discretionary powers ug kakulang sa transparency ug accountability sa paggamit sa kapin Php612.5 milyon nga confidential funds gikan Disyembre 2022 hangtod ikatulong quarter sa 2023.
Gilakip usab sa reklamo ang Notice of Disallowance sa Commission on Audit (COA) nga naglangkob sa Php73 milyon sa Php125 milyon nga confidential funds nga gipagawas sa OVP sa 2022, tungod sa kakulang sa dokumento ug kuwestiyonableng mga gastohan nga wala may kalabotan sa intelligence-gathering activities.
Human lang sa pipila ka minuto, gisumite usab ang ikaduhang impeachment complaint sa Tindig Pilipinas, kauban si Kiko Aquino Dee, Ging Deles, Fr. Flavie Villanueva ug uban pa. Kini gi-endorso nila ML Party-list Rep. Leila de Lima ug Akbayan Rep. Percy Cendaña. Ang ikaduhang reklamo nagpasangil og korapsyon, pagtabon-tabon sa kamatuoran, ug pagsupak sa konstitusyonal nga kaayuhan.
Sa pahayag sa kampo sa bise presidente, andam ang defense team ni VP Duterte nga atubangon ang mga bag-ong reklamo, ug giingon nga walay lig-on nga basihanan sa balaod ug kamatuoran ang mga pasangil.
Samtang, giingon sa Malacañang nga responsibilidad sa Kongreso ang pag-evaluate ug pagdesisyon sa maong mga reklamo. Matud pa sa mga lider sa Kamara, ang pagsumite sa duha ka bag-ong impeachment complaint mosunod sa bag-ong resolusyon sa Korte Suprema nga nagklaro sa one-year ban sa impeachment filings.
Photo Courtesy: Inquirer.net
