Ipagawas sa Land Transportation Office (LTO) ang usa ka Show Cause Order batok sa BMW Owners’ Society of Safe Riders (BOSS), ang organizer sa Boss Ironman Challenge Mindanao Cup 2026 nga gipahigayon sa General Santos City niadtong Enero 31 hangtod Pebrero 1, 2026. Ang lakang sa ahensya misunod human mikatap sa social media ang mga video ug hulagway sa mga aksidenteng nalambigit sa maong kalihukan.
Base sa pasiunang pagrepaso sa LTO sa viral nga mga video ug report, gituohang adunay daghang paglapas sa Republic Act No. 4136 o Land Transportation and Traffic Code, lakip ang overspeeding, paggamit og dili awtorisadong accessories ug modifications, illegal blinkers, paglapas sa traffic lights, ug pagpasagad sa mga traffic signs sama sa stop signs ug lane markings.
Giingon sa LTO nga kining mga paglapas maoy hinungdan sa daghang mga bangga nga nalambigit ang mga lumalahok sa challenge ug mga sibilyang sakyanan. Ang pinakamasub-anong insidente mao ang kamatayon sa usa ka 7 anyos nga bata human malambigit sa usa ka bangga. Laing fatal accident usab ang natala sa Kibawe, Bukidnon niadtong Pebrero 1, 2026, nga nalambigit ang usa ka participant sa kalihukan ug karon giimbestigahan pa sa lokal nga kagamhanan.
Human sa inisyal nga assessment, gilunsad sa LTO Intelligence and Investigation Division (IID) ang usa ka preliminary investigation aron masuta ang mga alegasyon ug makatigom og dugang ebidensya. Human makompleto ang imbestigasyon, pormal nga ipagawas ang Show Cause Order batok sa organizers.
Matod ni LTO Chief Assistant Secretary Markus V. Lacanilao, usa ka pahimangno ang maong insidente nga dili mahimong ikompromiso ang kaluwasan sa kalsada.
Courtesy of Land Transportation Office – Philippines
