Dili matod pa undangan sa mga pamilya sa 45 ka indibidwal nga namatay sa train crash sa duha ka high-speed train sa Spain niadtong Enero 18 ang pagpangita sa kamatuoran. Kini sumala sa usa ka emosyonal nga statement atol sa usa ka funeral service niadtong Enero 29.
Padayon pa usab nga gipaningkamotan sa Spain nga dawaton ang trahedya nga nahitabo duol sa Adamuz, nga gihulagway sa gobyerno isip usa sa adunay pinakadaghang namatay sa kasaysayan sa mga aksidente sa tren sa Europa.
Nagduhaduha usab ang Spain kung igo ba ang nahimong pamuhunan niini sa maintenance sa iladong railway system sa nasud, ilabi na human sa ubang mga insidente niadtong miaging semana, lakip ang pagkamatay sa usa ka train driver sa Catalonia. Present si King Felipe VI ug Queen Leticia sa seremonya, samtang wala ang presensya ni Prime Minister Pedro Sanchez ug Transport Minister Oscar Puente.
Base sa imbestigasyon sa mga awtoridad, gituohang adunay usa ka crack sa riles nga nahitabo ayha pa madiskaril ang tren nga padulong sa Madrid gikan sa Malaga. Paglabay sa 20 ka segundo, mibangga matud pa kini sa laing tren nga padulong sa Huelva gikan sa kasukwahi nga direksyon. Giingon usab nila nga posibleng moabot ra sa siyam ka segundo ang gilay-on nga oras tali sa duha ka tren.
Photo Courtecy to: www.yahoo.com
