Mokabat sa unom ka indibidwal ang patay human miigo ang bagyo sa Estados Unidos niadtong Domingo sa mga estado sa Georgia, Louisiana, Mississippi, Tennessee ug Texas.
Gani, maong kalamidad nagresulta usab sa pagkawala sa linya sa kuryente tungod nabulit sa mga daghang yelo. Nasayran nga ang bagyo nagdala ug nagyelong ulan, bug-at nga niyebe ug mapanganuron nga mga dalan.
Samtang naigo usab sa maong katalagman ang mga dagkong siyudad sama sa Atlanta, Houston ug Nashville, diin daghang negosyo ug mga distrito sa eskuylahan ang napugos sa pagsira aron sa pagpanalipod sa kaluwasan sa publiko.
Gikataho nga ang lugar sa Mississippi, adunay dul-an sa 180,000 ka mga tawo ang naapektuhan sa pagkawala sa kuryente ingon man mukabat usab sa dul-an nga 150,000 ka mga konsumidor sa Louisiana ang nagpabilin sa kangitngit. Samtang ang Texas ug Georgia adunay dul-an 100,000 ka mga kustomer nga naapektuhan sa walay kuryente.
Sumala sa PowerOutage.us, usa ka website nga nagsubay sa power outages sa tibuok Estados Unidos, nga ang Tennessee ang nakasinati sa pinakadaghang blackout nga adunay hangtod 339,000 ka mga kustomer nga walay kuryente niadtong hapon sa Domingo.
Sa pikas bahin, ang rehiyon sa Midwest, lakip ang Ohio nakasinati sa bug-at nga niyebe, Samtang ang siyudad sa Dayton ug Springfield sa habagatan-kasadpan sa estado nakasinati sa dul-an sa 30 sentimetros ang gitas-on sa niyebe. Kalabot niini, gipasidan-an sa lokal nga opisyal ang mga residente nga likayan ang mga nagyelo nga dalan ug magpabilin na lamang sa ilang mga panimalay alang sa ilang kaluwasan.
Gani, gidugang pa sa report nga daghan pang mga lugar sa Estados Unidos ang grabeng naakpektuhan sa maong kalamidad ug sa karun padayun pa ang mga operasyon aron lamang nga mabalik ang kuryente sa mga lugar nga naapektuhan.
Subay niini, mukabat usab sa kapin 16,000 ka mga flight sa tibuok Estados Unidos ang nakansela tungod sa bagyo ug ubay ubay usab ang nalangan. Gani, lakip sa mga lugar nga naapektuhan sa mga pagkansela ug paglangan mao ang Atlanta, Boston, Chicago, Dallas, Detroit, Houston, New York, Philadelphia ug Washington, D.C.
