Nahulog sa bag-ong all-time low ang Philippine peso batok sa US dollar niadtong Miyerkules, gumikan sa mas ubos nga target sa infrastructure spending sa kagamhanan.
Nisira ang piso sa Php59.44 kada 1 dolyar diin nihuyang kini og 9.9 sentimo gikan sa Php59.341 niadtong Martes. Nalabwan niini ang kanhi nga record low nga Php59.355 nga natala niadtong Enero 7.
Sumala sa usa ka economist, ang pagkahuyang sa piso resulta sa pagpaubos sa gobyerno sa target sa infrastructure spending ngadto sa 4.3% sa gross domestic product (GDP) gikan sa unang 5.1%, samtang nahimong mas mabinantayon ang mga awtoridad sunod sa mga isyu sa korapsyon.
Lakip usab sa naghatag og pressure sa piso ang gilauman nga paghunong sa Federal Reserve sa pagputol sa interest rates, bisan pa man kon nihinay ang inflation sa Estados Unidos ngadto sa labing ubos nga lebel sukad niadtong Marso 2021. Kini nga panan-aw nagpalig-on sa dolyar batok sa mga nag-unang kwarta sa tibuok kalibutan.
Hinuon, gamay nga napugngan ang pagkalugi sa piso tungod sa “net foreign buying” sa nasod sa local stock market. Miabot sa $4.9 million ang net foreign inflows niadtong Miyerkules, ang ika-9 nga sunod-sunod nga adlaw sa net buying, human sa $8.5 million sa miaging sesyon.
Photo courtesy: BusinessWorld Online
