Nikunhod ang gidaghanon sa mga pamilyang Pinoy nga nakasinati og kagutom niadtong Nobyembre 2025 kon itandi niadtong Septiyembre, sumala sa Social Weather Stations (SWS).
Nakaplagan sa survey nga 20.1% sa mga pamilya ang nakasinati og “involuntary hunger”—o ang kagutom tungod kay walay makaon—bisag kausa lang sa niaging tulo ka bulan. Mas ubos kini kon itandi sa 22% niadtong Septiyembre. Ang rate niadtong Hunyo 2025 anaa sa 16.1%.
Gipahigayon ang survey gikan Nobyembre 24 hangtod 30, 2025, sa 1,200 ka mga hamtong sa tibuok nasod. Miubos ang ihap sa mga gigutom sa Balance Luzon ug Metro Manila, apan misaka kini sa Mindanao ug Visayas.
Ang Mindanao ang nakatala sa labing taas nga ihap sa kagutom nga miabot sa 26.7%, gisundan sa Metro Manila ug Visayas nga parehong anaa sa 20.3%, ug ang Balance Luzon nga anaa sa 16.7%.
Sa 20.1% nga nakasinati og kagutom, 15.6% niini ang nakasinati og “moderate hunger” ug 4.5% ang “severe hunger.” Ang moderate hunger nagpasabot nga nakasinati og kagutom og “Kausa Lang” o “Pipila ka Higayon” sa tulo ka bulan, samtang ang severe hunger nagpasabot nga “Kanunay” o “nagsige.”
Gipakita usab sa survey nga 51% sa mga pamilya ang nag-isip sa ilang kaugalingon nga kabos, 12% ang naa sa “borderline,” ug 37% ang nag-ingon nga dili sila kabos.
Sa aspeto sa “food poverty,” 40% ang nag-isip sa ilang kaugalingon nga “food-poor,” 11% ang borderline, ug 49% ang dili food-poor.
Matod sa SWS, mas taas ang kagutom sa mga kabos ug food-poor, apan miubos usab ang rate sa mga “non-poor”—gikan sa 17% ngadto sa 13% sa kinatibuk-ang kagutom gikan Septiyembre hangtod Nobyembre. Sa mga food-poor, miubos ang kagutom gikan sa 31.5% ngadto sa 30.4%.
Photo courtesy: Philstar
