Gipasigarbo sa Department of Tourism (DOT) ang ilang paningkamot sa Sogod Bay sa Southern Leyte isip usa ka nag-uswag nga destinasyon sa diving sa tibuok kalibutan human ipasundayag ang mga atraksyon ilawom sa dagat sa Salon de la Plongée 2026, usa sa pinakadakong dive expos sa kalibutan, nga gihimo gikan Enero 8 hangtod 11 sa Paris Expo Porte de Versailles.
Matod ni DOT Eastern Visayas Regional Director Karina Rosa Tiopes sa usa ka pahayag niadtong Lunes, ang internasyonal nga eksibit naghatag sa rehiyon og estratehikong plataporma aron direktang makig-uban sa global dive market ug makadani og mas daghang langyawng diver nga tourist.
Dugang pa, Ikaduha na nga higayon nga miapil sila sa Salon de la Plongée, diin ang nag-unang tumong mao ang pagpalapad sa maabot sa dive market ug sa katapusan mapadaghan ang pag-abot sa mga dive enthusiast sa nasud.
Miapil usab sa kalihokan ang mga stakeholder sa dive tourism gikan sa Eastern Visayas, lakip ang mga representante sa Sogod Bay Scuba Resort ug Peter’s Dive Resort, nga nakig-istorya sa mga bisita ug naghatag og direktang impormasyon bahin sa talagsaong underwater attractions sa rehiyon.
Gipasabot ni Tiopes nga ang pag-apil sa Sogod Bay nagpakita sa determinasyon sa rehiyon sa pagpalambo sa malungtarong ug de-kalidad nga dive tourism, samtang ginaposisyon ang destinasyon isip usa ka angay bisitahon sulod sa lain-laing tourist spot sa Pilipinas.
Ang promosyon gihimo pinaagi sa DOT Philippines Pavilion, diin gipasiugda ang marine biodiversity sa Sogod Bay, mga coral reef, ug daghang macro life. Nagpahayag ang DOT og paglaum nga ang exposure sa Paris magdala og mas daghang internasyonal nga pag-abot ug mas lig-on nga pag-ila sa Sogod Bay isip usa sa mosunod nga pinakatop nga dive hotspots sa Pilipinas.
Photo Courtesy: PinayWise
