Nadakpan ang usa ka truck driver atol sa gipahigayong drug buy-bust operation sa mga personahe sa Tagum City Police Station uban sa DNPDEU ug PIU sa Barangay Magdum, Tagum City, kagahapong adlawa.
Ang suspetsado, giila nga si alyas Buds, 31-anyos, ulitawo, residente sa Tagum City ug lumas nga taga Manay, Davao Oriental, napalitan sa poseur-buyer ug usa ka sachet nga gituohang shabu gamit ang Php500 ug 12 ka Php1,000 nga machine-copied bills.
Nakuha gikan kaniya ang usa ka dako ug duha ka gagmay nga sachets sa gituohang shabu, usa ka black coin purse, ug usa ka Honda Beat motorcycle nga gigamit sa paghatod sa ilegal nga droga. Ang nakumpiska nga droga gibanabana nga nag kantidad ug Php34,000 ug adunay timbang nga mokabat sa kapin kon kulang lima ka gramo.
Sa kasamtangan anaa na ang suspek sa kustodiya sa Tagum City Police Station ug mag-atubang sa kasong paglapas sa RA 9165 o ang Comprehensive Dangerous Drugs Act of 2002.
Photo Courtesy : PNP DavNor Tagum CPS
