Narekober sa mga pwersa sa awtoridad ang gitagoan nga mga armas ug components sa improvised explosive device (IED) atol sa usa ka joint internal security operation sa hilit nga bahin sa Barangay Concepcion, Valencia City, alas 12:20 sa udto niadtong nakalabay nga adlaw.
Ang operasyon gipangunahan sa Regional Mobile Force Battalion 10 (RMFB 10) ilawom sa liderato sa 1003rd Maneuver Company, uban sa suporta sa 1004th Maneuver Company RMFB 10, 2nd Provincial Mobile Force Company Bukidnon, Bukidnon Provincial Explosives and Canine Unit, ug 89th Infantry Battalion, 10ID PA, uban sa giya sa usa ka misurender nga informant.
Lakip sa mga narekober nga war materials mao ang: Usa (1) ka M16 rifle nga adunay itom nga sling ug dunot na nga serial number, 44 ka bala sa 5.56mm, Tulo (3) ka short steel magazine alang sa M16, Duha (2) ka steel container nga puno sa mga IED components
Human sa pagkadiskubre sa mga gamit, gilayon nga gideploy ang Quick Reaction Team aron seguruhon ang lugar ug motabang sa pagkuha sa mga narekober nga materyales. Padayon usab ang pag-scan sa kasikbit nga lugar aron masiguro nga walay lain pang tinago nga armas o eksplosibo.
Gipasiugda sa operasyon nga ang pagsalig ug aktibong partisipasyon sa katawhan maoy yawe sa pagpadayon sa kalinaw ug kahusay sa Bukidnon.
Photo Courtesy: RMFB 10
