Gipaniguro ni Ritche Rubio, Central Market Head ug focal person sa EEDMO Iligan, nga dili kontra sa mga naninda ang ilang opisina, kondili batok sa kagubot, dili patas nga pagtratar ug pagpatuman sa lagda nga adunay doble nga sukdanan.
Matud niya, kon adunay market code, kinahanglan kining ipatuman sa tanang vendor ug dili pilion lamang ang mga angay nga pasunodon.
Giawhag usab ni Rubio ang katawhan sa Iligan ug sa kasikbit nga mga lungsod nga suportahan ang gagmayng mga negosyante pinaagi sa pagpamalit sa merkado, lakip na sa Central Market.
Pinaagi niini, matabangan ang lokal nga panginabuhian ug makapalit ang mga konsumante og presko ug barato nga mga produkto.
