Nadakpan na sa mga otoridad ang suspek sa brutal nga pagpatay sa usa ka Grade 9 nga dalagita nga napalgan patay alas 11 sa buntag niadtong Enero 8, 2025 sa Purok Sinait, Barangay Dagatkidavao, Valencia City, Bukidnon.
Ang suspek giilang si Marlon Rosaut, 29-anyos residente sa Purok 6, Sinait, Dagatkidavao, kinsa giturn-over sa mga otoridad sa bukirong bahin sa Sitio Buco, Barangay Banlag, sa syudad pinaagi sa panaghiusa ug pagtinabangay sa mga datu, bagani, barangay tanod, kapolisan, ug kasundaluhan.
Atol sa interogasyon sa suspetsado miangkon matod pa kini nga maoy responsable sa maong krimen, bisan wala pa niya giklaro ang rason sa iyang gibuhat. Padayon pa ang imbestigasyon aron matino ang tibuok detalye ug motibo sa pagpatay.
Samtang giklaro ni Bise Mayor Greizl Galario-Fernandez ug City Legal Officer Atty. Heinz Valdez nga dili hingpit o perpekto ang autopsy result, ilabina nga nalangan og tulo ka adlaw ang pagpatuman sa autopsy human sa pagkamatay sa biktima, rason pag-takedown sa social media post may kalabutan sa autopsy result sa namatay nga si Jenefer Incarnacion, aron malikayan ang posibleng conflict sa pamahayag sa suspetsado.
Sa karon anaa sa kostusdiya sa Valencia City Police Station ang suspetsado kinsa mag-atubang sa kasong murder kinsa giingong kanhi nabilanggo kaniadto sa kasong pagpatay sa anak sa iyang kapuyo.
Padayon ang panawagan sa kapulisan sa katawhan nga magpabiling mabinantayon ug makigtinabangay sa mga awtoridad aron mapadayon ang kalinaw ug kahusay sa komunidad.
