Padayon ang pag-aghat sa Lokal nga Pangagamhanan sa Bukidnon (LGU Bukidnon) sa mga mag-uuma nga adunay dakong kasingkasing ug tinguha sa pagpananom og kape, bisan pa man gamay lamang ang ilang luna.
Tumong niini nga matabangan ang mga mag-uuma sa umaabot, ilabi na kon mamunga na ang tanom nga kape, nga karon dako kaayo og demand ug mahal ang bili sa merkado.
Sa eksklusibong pakighinabi sa Juander Radyo Malaybalay, gibutyag ni Maria Lilith Turan, Provincial Agriculturist sa Provincial Agriculture Office Bukidnon, nga gidasig ang mga interesado nga moadto ug mokonsulta sa ilang tagsa-tagsa ka Municipal Agriculture Office (MAO) aron mangayo og hustong giya ug kahibalo sa husto nga pagpananom sa kape.
Matod niya, dili ginadasig sa LGU Bukidnon ang pagpananom nga walay kasingkasing ug walay igong kaandam, tungod kay nagkinahanglan kini og pasensya, kahibalo, ug padayon nga pag-atiman.
Dugang pa ni Turan, sa pagkakaron halos tanang sektor sa industriya sa kape sa Bukidnon, ilabi na ang mga namaligya na og ready-to-drink nga kape, aktibong nakigtambayayong sa LGU Bukidnon aron mapalambo pa ang lokal nga produksyon sa kape. Kini nga panaghiusa gipangulohan usab ni Governor Rogelio Oñiel P. Roque, nga nailhan sa iyang dakong gugma ug suporta sa sektor sa agrikultura sa lalawigan.
Ang maong paningkamot sa pagpalambo sa industriya sa kape kabahin sa Coffee Road Map o Coffee Project sa probinsya, nga tumong nga mapalig-on ang produksyon, mapataas ang kita sa mga mag-uuma, ug mapahimuslan ang dakong potensyal sa Bukidnon isip usa sa mga nag-unang tigprodyus og kape sa nasud
Photo Courtesy: LGU BUKIDNON
