Personal nga gisusi ni Bukidnon Police Provincial Office (PPO) Provincial Director Col. Oliver Sotto Navales sa crime scene ug gi-validate ang inisyal nga findings kalabot sa brutal nga pagpatay sa usa ka babayeng menor de edad nga nahitabo sa Purok 1, Sitio Sinait, Barangay Dagatkidavao, Valencia City.
Atol sa pakighinabi sa media, gipadayag sa opisyal nga adunay mga Persons of Interest (POIs) sa kaso, bisan pa ang impormasyon nga gihatag sa posibleng mga saksi kinahanglan pa nga mapamatud-an aron masiguro ang pagkamakanunayon niini diin narekober sa kapulisan ang mga personal nga butang sa biktima sa crime scene, lakip na ang cellphone nga posibleng makatabang sa imbestigasyon.
Si Col. Navales mipadayag ug pagkamalaumon nga pinaagi sa makuting imbestigasyon nga gipangunahan sa Valencia City Police Station, masulbad ang grabeng krimen sa labing dali nga panahon.
Ang Bukidnon PPO nagpasalig sa publiko sa paspas nga hustisya alang sa biktima ug sa pagpatuman sa tanang paningkamot aron mailhan ug masikop ang mga responsable.
Sa katapusan, nanawagan si Col. Navales sa komunidad nga makigtambayayong sa mga awtoridad pinaagi sa paghatag og bisan unsang impormasyon nga makatabang sa pagsulbad sa kaso diin ang pagpatunhay sa kalinaw, seguridad, ug hustisya usa ka responsibilidad nga gipanag-iya sa kapulisan ug sa publiko.
Photo Courtesy: BUKPPO
