Gipasiugda ni Pope Leo XIV niadtong Dominggo nga ang kaayohan sa mga lungsoranon sa Venezuela ang kinahanglan molabaw human napalagpot ang pangulo sa nasod nga si Nicolas Maduro sa usa ka operasyon nga gihimo sa Estados Unidos.
Human sa pag-ampo sa Angelus sa St. Peter’s Square, giingon sa labing unang American Pope nga kinahanglang unahon ang kaayohan sa katawhang Venezuelan, labaw sa bisan unsang interes o konsiderasyon.
Matod pa ni Pope Leo, ang pagbalhin sa gahom sa nasod kinahanglan nga mag-abli og dalan padulong sa pagtapos sa kagubot ug sa pag-uswag sa katarungan ug kalinaw. Gihatagan usab niya og gibug-aton ang kamahinungdanon sa pagrespeto sa soberanya sa Venezuela, ang pagpatuman sa naglungtad nga balaod ug Konstitusyon, ug ang pagpanalipod sa tawhanon ug sibil nga katungod sa matag lungsoranon.
Gihangyo usab sa Santo Papa ang dungan nga paglihok aron makatukod og usa ka malinawon ug lig-on nga kaugmaon alang sa nasod, nga adunay espesyal nga pagtagad sa mga kabus nga labing naapektuhan sa grabe nga krisis sa ekonomiya.
Ang pamahayag sa Santo Papa gihimo usa ka adlaw human gidakop si Maduro sa Caracas sa US special forces. Labot niini, giingon ni US President Donald Trump nga pangulohan sa Washington ang Venezuela ug gamiton ang mga reserba sa lana sa nasod.
Photo courtesy: Britannica
