Nag-file si Senator Erwin Tulfo og sugyot nga balaod nga nagtumong sa pagpaubos sa value-added tax (VAT) gikan sa 12% ngadto na sa 10% isip tubag sa padayong pagsaka sa presyo sa mga paliton ug serbisyo sa nasod.
Sa gi-file nga Senate Bill No. 1552 o ang “VAT Reduction Act of 2025”, gipasabot ni Tulfo nga ang pag-ubos sa VAT direktang makatabang sa pagpagaan sa palas-anon sa mga Pilipino sa kamahal sa mga paliton, apil na ang pagpalig-on sa ilang katakos sa pagpamalit.
Dugang pa sa senador, imbes nga magsalig ang mga Pinoy sa hinabang-pinansyal sa gobyerno nga mahimo matod pa nga masayang tungod sa posibleng korapsyon, mas maayo pa nga magpabilin ang kwarta sa bulsa sa mga lungsoranon. Gihisgotan usab niya nga ang mas ubos nga VAT makadasig sa mas taas nga pagpamalit sa mga konsumidor, nga mahimong hinungdan sa paglambo sa ekonomiya. Pinaagi niini, posibleng mabawi sa kagamhanan ang kakuwang sa kita samtang nagkalapad ang kalihokan sa ekonomiya.
Gihisgotan usab ni Tulfo nga ang Pilipinas ug Indonesia ang adunay labing taas nga VAT sa Southeast Asia nga parehong anaa sa 12%, samtang ang ubang silingang nasod adunay VAT nga gikan lang sa 7% hangtod 10%. Matod pa niya, kining VAT Reduction Bill dili lang makatabang sa mga ordinaryong lungsoranon kundi lakip na sa pagpauswag sa kompetisyon sa nasod sa rehiyon.
Photo courtesy: The Global Filipino Magazine
