Moagi sa pipila ka upgrade ang Rizal Memorial Sports Complex alang sa gikatakdang Women’s Tennis Association (WTA) 125 Women’s Open.
Ang Pilipinas ang gikatakdang mo-host sa torneyo nga pagahimoon karong Enero 2026. Matod pa ni Philippine Sports Commission (PSC) Chairman Patrick Gregorio, dili lang ang tennis center ang pokus sa mga upgrade kondili ang tibuok Rizal Sports Complex.
Lakip niini ang rehabilitasyon sa mga dalan aron mahimong asphalt roads, pagbutang og mga solar lights, ug uban pang mga kausaban. Sa tennis center nga anaa sa sulod sa complex, magdugang ang PSC og mas daghang lingkoranan aron mapataas ang seating capacity ug makaya niini ang hangtod sa duha ka libo ka mga manan-aw.
Sumala ni Gregorio, kinahanglang makab-ot sa Pilipinas ang international standards, ilabi na nga daghang mga tennis players ang gilaumang magdula sa torneyo. Kinahanglan usab matod pa nga mapakita sa tibuok kalibutan nga maayo ang pag-host ug ang tanang pasilidad sa tennis complex nga mahimong gamiton sa mga world-class tennis players.
Dugang niya, pagkahuman sa duha hangtod tulo ka semana, sigurado nga mahuman na ang tanang gikatakdang upgrades. Gikatakda ang torneyo gikan sa Enero 26 hangtod sa Enero 31.
Photo courtesy: Philippine Sports Commission
