Gipanghingusgan sa mga prosecutor sa International Criminal Court (ICC) nga si kanhi Presidente Rodrigo Duterte makahimo na sa pagtambong sa pagpaminaw alang sa confirmation of charges kalambigit sa giingong crimes against humanity sa iyang war on drugs. Kini human gideklarar sa usa ka panel sa mga eksperto nga siya “fit” o anaa sa saktong kondisyon alang sa legal proceedings.
Sumala sa dokumento gikan sa Office of the Prosecutor, giisip si Duterte nga usa ka “unreliable historian” sa iyang kaugalingong kahimsog ug mental nga kapasidad. Nakita sa mga eksperto nga duna siyay katakos nga makasabut sa mga pasangil ug ebidensya, ug makahatag og mga instruksyon sa iyang mga abogado.
Kahibaloang, nagmando ang ICC og medical evaluation human nangayo ang depensa og indefinite adjournment (paghunong sa walay tinong panahon) niadtong Agosto tungod sa panglawas ni Duterte.
Apan gisupak sa depensa ang nakit-an sa mga eksperto. Matod nila, limitado ang short-term memory ni Duterte, hinungdan nga malisdan siya sa pagsusi sa mga ebidensya o paghatag og instruksyon sa iyang abogado.
Busa, nangayo sila og usa ka evidentiary hearing aron masusi og maayo ang ebidensya sa mga eksperto.
Bisan pa niini, uyon ang depensa sa mga rekomendasyon kon unsaon pag-atiman ang panglawas sa kanhi presidente samtang nagpadayon ang proseso. Nanawagan karon ang mga prosecutor nga ipadayon na dayon ang pagpaminaw alang sa kumpirmasyon sa mga kaso.
Photo courtesy to: Senate of the Philippines
