Gibutyag sa online world sa komedyante ug TV host nga si Vice Ganda ang iyang tinguha nga makabaton og anak kauban ang iyang partner nga si Ion Perez pinaagi sa surrogacy. Matod ni Vice, dako ang kausaban sa iyang panan-aw sa kinabuhi tungod sa gugma ug suporta nga iyang nadawat gikan kang Ion, nga naghatag kaniya og kaisog nga mangandam sa pagka-ginikanan.
Sumala pa kaniya, andam na siyang moatubang sa mga pagsaway ug lain-laing opinyon sa publiko, tungod kay mas labaw kaniya ang tinguha nga mapalig-on ang ilang pamilya ug matuman ang iyang dugay nang damgo nga mahimong ginikanan.
Apan usa sa mga hagit nga iyang giatubang sa karon mao ang iyang kabusy sa showbiz. Gitambagan si Vice sa iyang doktor nga kinahanglan siyang mupahuway og labing menos tulo ka bulan alang sa proseso sa surrogacy, apan lisod pa kini matuman tungod sa iyang mga obligasyon sa programa nga “It’s Showtime” ug uban pang mga proyekto.
Bisan pa niini, nagpabilin ang determinasyon sa “Unkabogable Star” nga ipadayon ang maong plano sa hustong panahon. Alang kang Vice, ang pagka-ginikanan usa ka dakong panalangin ug damgo nga gusto niyang matuman aron mas makompleto ang iyang kinabuhi kauban si Ion.
via: VICE GANDA
