Giklaro ni Armed Forces of the Philippines (AFP) Chief Romeo Brawner Jr., nga dugay na nga naghatag og seguridad ang Philippine Navy sa mga mangingisdang Pilipino bahin sa West Philippine Sea.
Bisan paman wala pa nimando si Presidente Ferdinand Marcos Jr. ngadto sa Philippine Coast Guard nga palig onon ang proteksyon sa mga mangingisda nga nanagat sa WPS nunot sa pag-atake sa water cannon sa mga barko sa China batok sa mga mangingisdang Pinoy sa Escoda Shoal niadtong Disyembre 12 nga nakaangol ug upat ka mga Pinoy ug nakaguba sa ilang mga fishing boat.
Gibutyag kini sa labaw sa AFP dihang gipangutana kini mahitungod sa direktiba sa Presidente ngadto sa PCG nga ipakatap ang dugang nga mga barko sa mga estratehikong lokasyon sa WPS aron masiguro ang kaluwasan sa mga Pilipinong mangingisda samtang nanagat sa traditional fishing grounds.
Gitataw ni Gen. Brawner nga wala na nila isipa nga gray zone activities ang mga aksyon sa China sa WPS, inay gitawag nila ang mga aksyon sa China nga ilegal, agresibo ug manglimbongon.
Dugang niini ilang tubag sa mga aksyon sa China nagpabilin nga usa ka whole-of-nation approach, uban sa PCG, Bureau of Fisheries and Aquatic Resources (BFAR) ug Philippine Navy nga nakigtambayayong.
Matod sa opisyal, kung mamatikdan, sa matag paglawig sa mga mananagat nga Pilipino, ang BFAR maoy labing duol kanila, gisundan kini sa PCG, ug dili layo ang Philippine Navy, nga padayong nag-obserbar.
Butyag pa niya nga kining tanan nga mga ahensya adunay nagkadaiyang mga importanteng papel sa nasud.
Photo Courtesy to: Philippine News Agency
